October 23, 2014

അതിഥി

ഉച്ചയ്ക്കുറങ്ങവേ
ഉമ്മറത്തിണ്ണയിൽ
അതിഥിയുടെ സ്വരം.
"നാട്ടീന്നാ..."
കാലൻ കുട മടക്കി
ചെരുപ്പഴിച്ച്
അകത്തേക്ക്...
നഗരത്തുരുത്തിൽ
തനിച്ച് നടന്നു
നനഞ്ഞ കാലടികൾ.
കുശലം പറച്ചിൽ
ക്ഷേമാന്വേഷണങ്ങൾ
ഇടയ്ക്ക്
നിശബ്ദതയുടെ
കറുത്ത ചിരികൾ.
ഭയങ്കര ഉഷ്ണം...
ഫാൻ കറക്കി നോക്കാം!
ചായക്ക് ക്ഷണം - 
നിരാസംഒരു നുണ...
"ധൃതിയുണ്ട്പിന്നെയാകാം"
ഒരു മൗനം...
വറ്റി വരണ്ടുപോയ
നിഗൂഢതയുടെ കിണറുകൾ.
കസേരകൾ കരയുന്നു
ചെരുപ്പണിഞ്ഞ്
കാലൻ കുട തുറന്ന്
മാനം നോക്കുന്നു.
പിന്നീട് അതിഥി
അസ്തമനത്തിന് മുന്‍പ്
നാട്ടിലെത്തണമെന്നോർത്ത്
വേഗം നടക്കുന്നു.

2001.

October 21, 2014

ശിൽപഭംഗം

തച്ചന്‍റെ കൈകൾ
ആഞ്ഞു പതിക്കുന്നു...
നിമിഷവേഗങ്ങളുടെ
മൂർദ്ധന്യത്തിൽ
കൈയൊന്നു തെന്നിയാൽ...
കാതരമിഴികളുള്ള
കാമിനിയുടെ ശില്പം
തച്ചനെന്നും
അപൂർണമാണ്.

അപൂർണതയുടെ സൗന്ദര്യം!

കുരുടനായ തച്ചന്‍റെ
ഉൾപ്പതർച്ചകളിൽ
ശിൽപ്പമലയുന്നു.


2001

ആരാണ്?

രാത്രിയിൽ
ആർദ്രമായ്
മഴ
പൊഴിയുമ്പോൾ
മൂകതയാളിപ്പടരുന്ന
ശൂന്യമാക്കപ്പെട്ട
വീഥിയിൽ
ഇരുട്ടിന്‍റെ
അവ്യക്തതയിൽ
ഉൾത്തുടിപ്പാർന്ന്
പ്രണയം
മാറ്റുരച്ച
പൗർണമിയെ
ധ്യാനിക്കുന്നതാരാണ്?


2001

December 25, 2011

കവിത

പാല് തന്ന കൈക്ക്
തിരിഞ്ഞു കൊത്തിയവനേ
തന്തക്ക് തെറി പറഞ്ഞവനേ
തന്നോളമായാല്‍
മടിയില്‍ വെയ്ക്കാമോ?...
നീ തെളിക്കും വഴിക്ക്
ഞാനങ്ങ് വന്നീടാം...

December 17, 2011

വിപരീതം

ഞാനെന്തോ പറഞ്ഞു
നിന്‍റെ മുഖം കറുത്തു.

നീയെന്തോപറഞ്ഞെന്‍റെ
മുഖം  വെളുത്തു.

നിന്‍റെ പുരികത്തിന്‍
ജ്യാമിതി കണ്ടറിയാം
ഉള്ളിലെ അഗ്നിപര്‍വതം
പുകയുന്നത്.

നമ്മളൊരുമിച്ചു
ഓരോന്ന് പറയുമ്പോള്‍
പരസ്പരം  ചിന്നിച്ചിതറി
ഒരു  മഴവില്ല് വിരിയുന്നു.
മഴവില്ല് പോലെ നാം സുതാര്യമാവുന്നു.

പെയ്യാനായുന്ന
ഒരു വലിയ മഴയുടെ ആരവം
നമ്മെ നിശബ്ദരാക്കുന്നു.

--------------------------------------